पुणे : पुण्यभूषण पुरस्कारासाठी सात-आठ नावे भाईंनी सुचवली होती... ‘‘पुलं’मुळेच माझे वक्तृत्व बहरले,’ असे तत्कालीन केंद्रीय मंत्री मधू दंडवते यांनी सांगितले होते... ‘‘पुलं’ची ओळख मी करून देणार,’ असं सांगण्यासाठी कवयित्री शांताबाई शेळके यांनी निनावी फोन केला होता.... पु. ल. देशपांडे यांच्या अशा अनेक आठवणींना उजाळा देणारी ऑनलाइन मैफल नुकतीच ‘पुलं’च्या विसाव्या स्मृतिदिनानिमित्त रंगली होती.
‘आम्ही एकपात्री, महाराष्ट्र’ यांच्या वतीने आयोजित करण्यात आलेल्या या फेसबुक लाइव्ह मैफलीचे नाव होते ‘पुण्यभूषण ते पुलोत्सव’ आणि ‘तुमचे आमचे पुलं’. ‘त्रिदल’ संस्थेचे संस्थापक डॉ. सतीश देसाई यांच्याशी ‘आम्ही एकपात्री’चे अध्यक्ष संतोष चोरडिया यांनी संवाद साधला. पुण्यभूषण पुरस्काराची सुचलेली संकल्पना, ‘पुलं’नी तो स्वीकारल्यानंतरची भावना, बालगंधर्व रंगमंदिरात झालेली अभूतपूर्व गर्दी, ‘पुलं’च्या जन्मशताब्दी वर्षानिमित्त जगभरात साजरा झालेला ‘ग्लोबल पुलोत्सव’ अशा विविध स्मृतींना सतीश देसाई यांनी उजाळा दिला.
त्यानंतर ‘आम्ही एकपात्री’चे कलाकार वंदन नगरकर यांनी ‘रामनगरी’ या पुस्तकातील ‘पुलं’च्या प्रस्तावनेचे अभिवाचन केले. बंडा जोशी यांनी पुलंची आकाशवाणीतील आठवण सांगितली. डॉ. कविता घिया यांनी ‘पुलं’च्या कार्याला आणि त्यांच्या चित्रपटांना शब्दांत गुंफून स्वरचित कविता सादर केली. रत्ना दहिवेलकर यांनी ‘पुलं’ना आलेले रसिकांचे अनुभव कथन केले. लेखनासाठी ‘पुलं’नी कसे प्रोत्साहन दिले, हे मारुती यादव यांनी सांगितले. गायिका अनुपमा खरे यांनी कौसल्येचा राम, नाच रे मोरा ही गाणी सादर केली. या ऑनलाइन मैफलीचे सूत्रसंचालन संतोष चोरडिया यांनी केले. जगभरातील रसिकांना हा सोहळा अनुभवता आला.
(व्हिडिओ सोबत देत आहोत.)